شیخ عبد الجلیل چوہڑ شاہ بندگی | تعارف
شیخ عبد الجلیل چوہڑ بندگی سہروردی سلسلہ سہروردیہ کے بڑے بزرگان میں شمار ہوتے ہیں
نام و نسب
شیخ عبد الجلیل سہروردی
لقب:قطب العالم،چوہڑبندگی
آپ کا سلسلہ نسب چند واسطوں سے سلطان التارکین شیخ حمید الدین حاکم بادشاہ کیچ مکران سے ملتا ہے۔
شیخ عبد الجلیل بن شیخ ابو الفتح بن شیخ عبد العزیز بن شیخ عبد الجلیل بن شیخ شہاب الدین بن شیخ نور الدین بن سلطان التارکین شیخ حمید الدین حاکم۔
چوہڑ بندگی کی وجہ تسمیہ
چوہڑ ہندی زبان میں "شکار کو تدبیر سے قابو کرنے والا” کو کہتے ہیں
ولادت
آپ کی ولادت باسعادت قصبہ”موکہ”ریاست بہاولپور میں ہوئی۔
تحصیل علم
آپ نے ابتدائی تعلیم اپنے والد گرامی سے حاصل کی پھر بلاد اسلامیہ کے مختلف شہروں میں جید علماء سے اخذ علم کیا یہاں تک کہ علوم ظاہرہ میں کامل واکمل ہو گئے۔
بیعت و خلافت
آپ نے علوم ظاہری کی تکمیل کے بعد اپنے عظیم والد بزرگوار شیخ ابو الفتح سہروردی کے دست حق پرست پر بیعت کی اور ان کی خدمت میں رہ کر فیوضات باطنی کی دولت سے مالا مال ہوئے آپ کے والد بزرگوار نے محبت و شفقت پدری کے باوجود آپ سے سخت ترین ریاضتیں اور مجاہدے کرائے مجاہدات و ریاضات کے بعد خلافت عطاء فرمائی۔
سیرت و خصائص
قطب العالم شیخ المشائخ عارف باللہ عالم السنہ امام الاولیاء سیدالاصفیاء شیخ عبدالجلیل چوہڑ بندگی کی ذات بابرکت سے دین اسلام کو بہت فروغ حاصل ہوا اسی طرح سلسلہ عالیہ سہروردیہ کی خوب اشاعت ہوئی آپ نے دنیا کی سیاحت کی اور اس دوران میں تبلیغ کا فریضہ ادا کر کے لا تعداد افراد کو ایمان و عرفان کی دولت سے مالا مال کیا اور بہت سے گم کردہ راہوں کو گمراہی کے دلدل سے نکال کر صراط مستقیم پر گامزن کیا اور کوبہ کوبہ شہر بہ شہر پھرت پھراتے مکہ مکرمہ پہنچے اور حج بیت اللہ شریف کی سعادت حاصل کی قیام مکہ مکرمہ کے دوران میں وہاں کے علما اور مشائخ آپ کی خدمت میں حاضر رہتے لاتعداد افراد آ کے فیوضات باطنیہ سے مالا مال ہوئے اور ہزاروں افراد آپ کے دست حق پرست پر بیعت سے مشرف ہوئے آپ انتہا درجہ کے متقی پابند شریعت و طریقت اور اخلاق کریمانہ میں بے مثال تھے آپ کی خدمت میں حاضری دینے والا غلام بے دام ہوکے رہ جاتا تھا آپ نے تمام عمر یادِ خدا اور خدمت خلق اللہ میں گزاری اور رشد و ہدایت میں نمایاں کردارادا کرکے سلسلہ عالیہ سہروردیہ میں لوگوں کو بیعت سے شرف یاب کیا آپ کی ذات والا صفات مشائخ زمانہ بالخصوص مشائخ سہروردی میں خاص مقام رکھتی تھی۔لاہور کے قدیم ترین سہروردی بزرگوں میں آپ کا شمار ہوتا تھا آپ اپنے وقت کے قطب الارشاد تھے۔
وفات
آپ کاوصال 9 رجب المرجب 910ھ مطابق 16 دسمبر 1504ء میں ہوا۔ آپ کامزارشریف لاہور میں میکلوڈ روڈ پر مرجع خلائق ہے۔